Ó, hátt upphafni ríkdómur guðlegrar náttúru,
sýn mér vegu þína,
sem þú hefur í vísdómi þínum fyrirbúið
og opna mér hinn dýrasta fjársjóð,
sem þú hefur kallað mig til:
að skilja af skynsemi,
að eiga og njóta kærleika með englunum meira en öll sköpunin,
að taka arf með þínum einkasyni, Drottni vorum Jesú Kristi,
að taka við þér samkvæmt þinni eilífu visku
og með þinni hjálp að halda mér frá öllu illu.
Því að þú hefur hafið mig upp yfir alla sköpunina
og sett á mig innsigli þinnar eilífu ímyndar
og gert sálu mína óskiljanlega allri sköpun þinni
og þú hefur engan gert þér líkan nema manninn í sálu sinni.
Kenn þú mér því að lifa þannig
að ég sé aldrei án þín,
og að þú verðir aldrei hindraður í kærleiksríku, streymandi verki þínu í mér,
og að ég gefi mig heldur aldrei neinni girnd á vald,
né verði hugur minn upptekinn af neinu af sköpun þinni,
heldur aðeins af þér.
Drottinn, þú ert andi
sem ert óskiljanlegur allri sköpuninni.
Þú gerir sálina andlegrar veru, að hún í anda sínum sé sett æðst allrar sköpunar,
svo að hún, þú eilífa viska, verði fullnægð eftir þínum guðdómlega vilja
og verði af náð leyst frá öllum gagnslausum myndum sem hún hefur hleypt inn.
Því að þú hefur gert sálina áþreifanlega að þinni eign og og jafna þér.
Gæt hennar því
að í henni megi ekkert búa nema þú einn.
Því að þú ert þrennur í persónum
og einnig að eðli til Guðlegrar náttúru,
það er: Faðir, Sonur, Heilagur andi
og eilíflega blessaður almáttugur Guð.
Amen.
Þýðing: Böðvar Björgvinsson.
Meistari Eckhart (Meister Eckhart O.P.) var uppi frá u.þ.b. 1260 til u.þ.b. 1328.
Hann var mikill hugsuður og launhelgamaður eða mýstiker (mystic) og lagði mikla áherslu á fulla einingu við Guð með vísan einkum til Jóhannesarritanna (guðspjall og bréf).